Кіраўнік ЦРУ прыязджаў у Расію, каб спыніць мабілізацыю, сцвярджае The Wall Street Journal

Кіраўнік ЦРУ Джон Рэткліф прыляцеў у Маскву, паведамляе амерыканскі тэлеканал CBS. Самалёт Рэткліфа прызямліўся ва Унукаве.

Сёння журналісты РБК заўважылі незвычайны рэйс амерыканскага ваенна-транспартнага самалёта Boeing C-17 Globemaster III з Рыгі ў расійскую сталіцу.

Паводле звестак Flightradar24, самалёт ВПС ЗША спачатку вылецеў з авіябазы Эндрус непадалёк ад Вашынгтона ў Латвію, а сёння працягнуў шлях у Расію. Сэрвіс адсочвання палётаў паказваў яго на падлёце да маскоўскага аэрапорта Унукава.

Афіцыйна мэта візіту пакуль не раскрываецца. Прэс-сакратар Крамля Дзмітрый Пяскоў заявіў, што не мае інфармацыі пра гэты самалёт. Вашынгтон таксама пакуль не даваў афіцыйных каментарыяў наконт візіту Рэткліфа.

Паводле звестак амерыканскай разведкі, Расія нібыта рыхтуе новую мабілізацыю, каб праверыць гатоўнасць НАТА да эскалацыі. Кіраўнік ЦРУ прыехаў у Маскву, каб папярэдзіць Пуціна не рабіць гэтага, піша выданне.

Пры гэтым раней прэс-сакратар Пуціна паведаміў журналістам:

«Вы ведаеце, гэта ўсё ўкідваюць украінскія ўлады. Натуральна, рэжым спрабуе ідэалагічна разгойдваць сітуацыю ў нас у краіне. Гэта ўсё такія інфармацыйныя ўкіды, якія мэтанакіравана ўкідваюцца ў інфармацыйную прастору», — сказаў ён.

Раней Прэзідэнт Украіны папярэджваў, што Расія можа абвясціць новую мабілізацыю пасля выбараў у Дзяржаўную думу гэтай восенню. Зяленскі лічыць, што Масква можа мабілізаваць да 500 тысяч новых вайскоўцаў. Латвійская разведка таксама прагназуе, што тады імавернасць мабілізацыі ўзрасце. Крыніцы незалежных расійскіх выданняў «Медуза», «Важные истории» і «Верстка» таксама сцвярджаюць, што расійскія чыноўнікі пачынаюць абмяркоўваць новую мабілізацыю, паколькі колькасць ахвотных служыць ва ўзброеных сілах у Расіі змяншаецца.

У тэму: Прызыў і мабілізацыя ў Маскве: як мужчыну падрыхтавацца да восені 2026 года