Выдаткі вышэйшыя, даступнасць ніжэйшая. ЛГБТК+-людзі значна часцей адмаўляюцца ад лячэння і лекаў праз недахоп грошай — даследаванне KFF

Новае апытанне KFF, якое ахапіла каля 26 тысяч чалавек, паказала, што дарослыя ЛГБТК+ сутыкаюцца са значна больш сур'ёзнымі перашкодамі пры атрыманні і аплаце медыцынскай дапамогі, чым людзі, якія не належаць да супольнасці. Акрамя таго, прадстаўнікі ЛГБТК+ трацяць значна больш грошай на медыцынскае страхаванне.

Doberman Media вывучыў дакумент і пераказвае асноўныя высновы гэтага даследавання.

Што менавіта высветлілі даследчыкі?

Людзі ЛГБТК+ сутыкаюцца са значна большымі цяжкасцямі як з доступам да медыцынскіх паслуг, так і з магчымасцю іх аплаціць.

Паводле даных апытання, геі, бісексуалы і трансгендарныя людзі амаль удвая часцей, чым астатняе насельніцтва, вымушаны адмаўляцца ад выпісаных ім рэцэптурных лекаў. Акрамя таго:

• Амаль 6 з 10 прадстаўнікоў ЛГБТК+ заявілі, што ім даводзілася адкладаць або цалкам адмаўляцца ад неабходнай медыцынскай дапамогі з-за розных перашкод. Сярод людзей, якія не належаць да супольнасці, гэты паказчык складае 38%.
• 3 з 10 рэспандэнтаў прызналіся, што з цяжкасцю аплачваюць рахункі за медыцынскія паслугі (сярод не-ЛГБТК+-насельніцтва з гэтым сутыкаецца 21%).

Каму даводзіцца найцяжэй?

Жанчынам і трансгендарным людзям — яны сутыкаюцца з яшчэ больш высокімі бар'ерамі ў сферы аховы здароўя, чым геі.

• Амаль дзве траціны ЛГБТК+-жанчын паведамілі, што не змаглі запісацца на прыём да ўрача, аплаціць медыцынскія паслугі або атрымаць доступ да лячэння па іншых прычынах.
• Сярод трансгендарных людзей пра падобныя цяжкасці заявілі больш за 80% апытаных.
• Для параўнання: сярод людзей, якія не належаць да ЛГБТК+, з якімі-небудзь перашкодамі пры атрыманні медыцынскай дапамогі сутыкнуліся толькі 38%.

У чым прычыны такой няроўнасці?

Як паказваюць папярэднія даследаванні KFF, ключавую ролю тут адыгрываюць сукупнасць сацыяльна-эканамічных фактараў і стан здароўя прадстаўнікоў супольнасці. ЛГБТК+-людзі часцей маюць больш нізкія даходы і сутыкаюцца з больш шырокім спектрам праблем са здароўем. У выніку іх рэальная патрэба ў медыцынскай дапамозе аказваецца вышэйшай, а фінансавых магчымасцей аплаціць страхоўку, лекі і рахункі за лячэнне — значна менш.