Ад мірнага атама да пячорнай гамафобіі. Прадстаўніка Расіі ў МАГАТЭ адхілілі ад пасады праз нападкі на геяў і феміністак

Міжнароднае агенцтва па атамнай энергіі (МАГАТЭ) адхіліла ад працы Міхаіла Чудакова — намесніка генеральнага дырэктара агенцтва і аднаго з найбольш высокапастаўленых расійскіх чыноўнікаў у сістэме ААН. Прычынай стала этычнае расследаванне з-за напісанай ім кнігі «Трактат пра жыццё», у якой феміністкі названыя «істэрычнымі фанатычкамі», а геі і лесбіянкі — «вычварэнцамі», піша Bloomberg са спасылкай на чатыры знаёмыя з сітуацыяй крыніцы.

Чудакоў займае пасаду намесніка гендырэктара МАГАТЭ з 2015 года і кіруе дэпартаментам, адказным за развіццё атамнай энергетыкі. Кніга была апублікаваная ў 2025 годзе, аднак увагу агенцтва прыцягнула пасля таго, як Чудакоў прадставіў яе на сустрэчы Маладога ядзернага пакалення ААН у Вене. Пазней моладзевая група перадала кнігу кіраўніку аддзела этыкі МАГАТЭ.

У 76-старонкавай кнізе Чудакоў, у прыватнасці, заклікае не падтрымліваць фемінісцкія рухі і сцвярджае, што жанчыны ўжо маюць больш правоў, чым мужчыны. Лідарак барацьбы за правы жанчын ён называе «істэрычнымі фанатычкамі». Геяў і лесбіянак Чудакоў называе «вычварэнцамі і садамітамі», аднаполыя адносіны — «грахоўнымі адхіленнямі», а іх уплыў на моладзь — «атрутай».

Кніга была выдадзеная пад псеўданімам Валянцін Ваюцін і прысвечаная дзецям Чудакова. У ёй ён таксама спасылаецца на сваю працу ў МАГАТЭ і выступае за «строгае аўтарытарнае кіраўніцтва», а таксама за «дыктатуру», замаскіраваную пад дэмакратыю. У іншых фрагментах аўтар заклікае захоўваць вернасць «сваёй краіне Расіі, свайму ўраду» і выступае за пераслед дысідэнтаў.

Як адзначае Bloomberg, правілы МАГАТЭ забараняюць супрацоўнікам дапускаць дыскрымінацыю і дзеянні, здольныя паставіць пад пагрозу бяспечнае працоўнае асяроддзе. Супрацоўнікі агенцтва, якія жадаюць пісаць кнігі, павінны таксама атрымліваць дазвол штаб-кватэры і пазбягаць далікатных тэм. Этычныя нормы патрабуюць ад міжнародных службоўцаў захоўваць «стрыманасць і такт», а парушэнні могуць пацягнуць за сабой дысцыплінарныя меры.

Былая пасолка ЗША ў МАГАТЭ Лора Холгейт назвала публікацыю і распаўсюджванне такой кнігі міжнародным чыноўнікам «вельмі недарэчнымі». Паводле яе слоў, змест кнігі не адпавядае патрабаванням нейтральнасці і прафесіяналізму, што прад'яўляюцца да супрацоўнікаў міжнародных арганізацый.