У Hornet з’явілася рэклама расійскага мессенджара MAX. Пасля звароту Doberman.media яе выдалілі

Карыстальнікі Hornet заўважылі рэкламу расійскага сэрвісу MAX у найбуйнейшым міжнародным дадатку для знаёмстваў сярод геяў і бісэксуальных мужчын Hornet. Пасля запыту Doberman.media адміністрацыя Hornet правяла ўнутраную праверку і заявіла, што рэклама была выдаленая, а яе далейшы паказ на платформе заблакаваны.

У чэрвені карыстальнікі Hornet пачалі паведамляць пра з'яўленне рэкламы прыкладання MAX. Скрыншоты рэкламных аб'яў былі апублікаваныя ў сацыяльных сетках і выклікалі пытанні пра тое, якім чынам расійскі сэрвіс апынуўся на платформе, арыентаванай на ЛГБТК-аудыторыю.

MAX быў запушчаны пры падтрымцы расійскіх уладаў як нацыянальная лічбавая платформа. Крытыкі праекта ўказваюць на рызыкі канфідэнцыяльнасці і патэнцыйнага дзяржаўнага кантролю над карыстальніцкімі данымі. Асаблівую трывогу гэта выклікае сярод ЛГБТК-людзей, улічваючы ўзмацненне ціску на супольнасць у Расіі.

Пасля выяўлення рэкламы рэдакцыя Doberman.media звярнулася ў Hornet па тлумачэнні.

У адказ рэдакцыі менеджар па рэкламнай манетызацыі Hornet Пэдра Марэна сказаў, што кампанія пачала ўнутраную праверку адразу пасля атрымання звароту ад Doberman’а.

«Мы неадкладна пачалі ўнутраную праверку і прынялі меры сумесна з нашымі рэкламнымі партнёрамі, каб выдаліць гэтага рэкламадаўца і прадухіліць яго з'яўленне ў Hornet у будучыні».

У Hornet патлумачылі, што частка рэкламы размяшчаецца праз аўтаматычныя праграмныя рэкламныя сеткі, дзе адначасова ўдзельнічаюць тысячы рэкламадаўцаў. Паводле слоў кампаніі, кіраўніцтва платформы не ведала пра прысутнасць гэтай рэкламнай кампаніі да атрымання запыту ад Doberman.media.

Таксама ў Hornet падкрэслілі, што платформа імкнецца забяспечваць бяспечную прастору для ЛГБТК-супольнасцей па ўсім свеце і разглядае рэкламу, якая можа супярэчыць гэтай місіі.

Кантэкст. У маі 2026 года даследчык інфармацыйнай бяспекі апублікаваў вынікі аналізу Android-версіі MAX. Паводле яго сцвярджэння, дадатак утрымлівае механізмы, якія дазваляюць вызначаць выкарыстанне VPN, збіраць дадатковыя звесткі пра прыладу і выконваць дзеянні, што выклікаюць сур'ёзныя пытанні ў спецыялістаў па лічбавай бяспецы.

Пазней частка высноў была пацверджана незалежным тэхнічным аналізам праваабарончай арганізацыі RKS Global. З 25 заяўленых праблем спецыялісты цалкам пацвердзілі 14 і часткова пацвердзілі яшчэ некалькі. Распрацоўшчыкі MAX абвінавачанні адхілілі.

Эксперты таксама звяртаюць увагу на адсутнасць паўнавартаснага скразнога шыфравання па змаўчанні і на тое, што даныя карыстальнікаў патэнцыйна могуць быць даступныя сервернай інфраструктуры ўнутры Расіі.