50 актывістаў затрыманыя, сайты заблакаваныя: Турцыя зладзіла масавую зачыстку ЛГБТ+-супольнасці

У Турцыі разгарнулася маштабная хваля сілавых ператрусаў, затрыманняў і блакіровак, накіраваная супраць актывістаў, праваабарончых асацыяцый і ўстаноў ЛГБТК+-супольнасці. Аперацыі сіл паліцыі і жандармерыі пачаліся адначасова а 1:00 ночы 13 верасня паводле мясцовага часу і ахапілі 15 правінцый краіны, уключаючы Стамбул, Анкару, Ізмір, Айдын і Мерсін. У Стамбуле супрацоўнікі праваахоўных органаў правялі ператрусы ў гей-бары, начным клубе і мужчынскім хамаме, а таксама ўварваліся ў прыватныя дамы актывістаў.

Галоўная пракуратура Стамбула заявіла аб правядзенні спецаперацый у дачыненні да 38 падазраваных у 12 правінцыях і пацвердзіла затрыманне 26 чалавек. Аднак праваабарончая асацыяцыя, якая базуецца ў Анкары, Kaos GL паведамляе пра значна большы маштаб рэпрэсій: паводле яе звестак, затрымана не менш за 50 актывістаў, прычым больш за 10 з іх былі ўзятыя пад варту непасрэдна ў сваіх дамах. У цэлым турэцкія ўлады распачалі судовыя разборы ў дачыненні да 162 падазраваныя, 9 асацыяцый і 13 прадпрыемстваў.

Паліцэйскія рэйды закранулі офісы шасці ЛГБТК+-арганізацый. Пракуратура заявіла, што падчас ператрусаў у памяшканнях асацыяцый былі канфіскаваныя наркотыкі, лічбавае абсталяванне, кантрабандны алкаголь і агнястрэльная зброя. Афіцыйныя следчыя органы выставілі абвінавачанні ва ўцягванні ў прастытуцыю, распаўсюджванні непрыстойных матэрыялаў і «абразе грамадскай прыстойнасці». Акрамя таго, пракуратура сцвярджае, што атрымала доказы неналежнага ўплыву на дзяцей і непаўналетніх у пытаннях сексуальнай арыентацыі і гендарнай ідэнтычнасці. Міністр юстыцыі Турцыі Акін Гюрлек таксама заявіў, што гэтыя асацыяцыі атрымлівалі значнае фінансаванне з міжнародных крыніц і замежных агенцтваў.

Зразумела, рэальных доказаў таго, пра што заявіла пракуратура Турцыі, няма!

Паралельна з арыштамі турэцкая дзяржава разгарнула жорсткую кампанію па зачыстцы інфармацыйнай прасторы. На падставе рашэння суддзі па крымінальных справах Генеральнай пракуратуры Стамбула Прэзідэнцтва па кібербяспецы атрымала распараджэнне заблакіраваць доступ да вэб-сайтаў і акаўнтаў у сацыяльных сетках, якія належаць ЛГБТК+-арганізацыям.

Пад дзяржаўную блакіроўку трапілі афіцыйныя вэб-сайты праваабарончых платформаў KaosGL і Velvele, а таксама дзясяткі рэсурсаў і асабістых старонак актывістаў. У сацыяльнай сетцы X (былы Twitter) на патрабаванне ўладаў было заблакавана каля 15 акаўнтаў ключавых турэцкіх ЛГБТК+-асацыяцый і праваабаронцаў.

Сілавой кампаніі далі афіцыйную назву «Мая сям'я ў бяспецы». Міністр юстыцыі Акін Гюрлек публічна падкрэсліў у сацсетцы X, што аперацыі праводзяцца ў рамках абвешчанага прэзідэнтам Рэджэпам Таіпам Эрдаганам «Дзесяцігоддзя сям'і і насельніцтва» — ініцыятывы, накіраванай на абарону грамадскага парадку, дзяцей і інстытута традыцыйнай сям'і. Афіцыйнай мэтай гэтай дзяржаўнай праграмы абвешчана барацьба са зніжэннем нараджальнасці і старэннем насельніцтва Турцыі.

Хоць паводле турэцкага заканадаўства гомасексуальнасць не з'яўляецца крымінальным злачынствам, варожасць да ЛГБТК+-людзей адкрыта гучыць з найвышэйшых дзяржаўных трыбун. Прэзідэнт Эрдаган неаднаразова публічна называў прадстаўнікоў ЛГБТ-супольнасці «вычварэнцамі» і абвінавачваў іх у спрыянні падзенню нараджальнасці ў краіне.

Праваабарончыя арганізацыі і апазіцыйныя дэпутаты выступілі з рэзкай крытыкай дзеянняў урада. Турэцкая асацыяцыя правоў чалавека у сваёй афіцыйнай заяве назвала аперацыю «дзяржаўнай дыскрымінацыяй, палітыкай страху і дэмантажом грамадзянскай супольнасці». Праваабаронцы падкрэслілі, што тое, што адбываецца, — гэта не прававое расследаванне, а палітычная аперацыя па навязванні грамадству маналітнай мадэлі сям'і і выцясненні незалежнай грамадзянскай супольнасці пад выглядам абароны дзяцей.

У сваю чаргу, дэпутатка парламента Стамбула ад левай пракурдскай дэмакратычнай партыі Озгуль Сакі заявіла, што існаванне ЛГБТК+-супольнасці немагчыма забараніць або спыніць сілавымі метадамі, нагадаўшы, што «правы ЛГБТК+ — гэта правы чалавека».