Нямецкі фермер ратуе бараноў-геяў ад бойні — і на выручаныя грошы дапамагае людзям ратавацца ад пераследу

У звычайнай сельскай гаспадарцы бараны, якія адмаўляюцца спароўвацца з авечкамі, лічацца «нерэнтабельнымі»: іх нельга выкарыстоўваць для развядзення, таму іх адпраўляюць на забой. Нямецкі фермер Міхаэль Шцюке вырашыў гэта выправіць. Ён стварыў праект Rainbow Wool, які ператварыў «непатрэбных» жывёл у сімвал барацьбы за правы чалавека.

Расказваем, як уладкавана ферма для бараноў-геяў і як іх воўна дапамагае ратаваць жыцці.

• Нямецкі фермер Міхаэль Шцюке заснаваў кампанію Rainbow Wool у 2023 годзе, каб уратаваць бараноў-геяў ад адпраўкі на бойню.
• У 2025 годзе некамерцыйная арганізацыя ў супрацоўніцтве з Grindr правяла паказ мод трыкатажных вырабаў з пражы, атрыманай ад авечак Шцюке.
• Даходы ад продажу Rainbow Wool накіроўваюцца на падтрымку ЛГБТК+-супольнасці і дапамаглі амаль 2000 чалавек ва ўсім свеце пазбегнуць пераследу на глебе гамафобіі.

Занадта гей, каб ісці на мяса

Па ацэнках экспертаў, каля 8% бараноў выяўляюць выключна гомасексуальныя паводзіны. Для індустрыі, арыентаванай на прыбытак, такія жывёлы непатрэбныя. Міхаэль Шцюке, які займаецца сельскай гаспадаркай з 1995 года, пачаў забіраць такіх бараноў да сябе, каб уратаваць іх ад непазбежнай смерці.

Ідэя праекта нарадзілася ў 2023 годзе пасля размовы Міхаэля з яго падругай Надзеяй Лейтэс. Надзя, якая пераехала ў Германію з Расіі, была абураная лёсам жывёл і прапанавала стварыць некамерцыйную арганізацыю. Пазней да іх далучыўся муж Міхаэля, Ёхан.

Як правяраюць «арыентацыю» барана?

Каб у статак Rainbow Wool не траплялі звычайныя жывёлы, на ферме праводзяць свой від тэсту.

• У перыяд «шлюбнага сезона» барана змяшчаюць у адзін загон з самкамі.
• Калі ён не праяўляе да іх ніякай цікавасці, гэта становіцца першай прыкметай яго гомасэксуальнасці.
• Затым барана выпускаюць да астатняга статку «геяў», дзе яго перавагі пацвярджаюцца на практыцы літаральна за некалькі хвілін.

Ад Grindr да падыумоў Нью-Ёрка

У 2025 годзе праект атрымаў сусветную вядомасць дзякуючы калабарацыі з дадаткам для знаёмстваў Grindr. Разам яны арганізавалі ў Нью-Ёрку паказ мод «I Wool Survive».

Дызайнер Майкл Шмідт, які працаваў з Мадоннай і Шэр, стварыў калекцыю з 37 прадметаў адзення, цалкам звязаных з воўны авечак з фермы Шцюке. Паводле слоў дызайнера, гэта стала магутнай метафарай таго, як у многіх краінах дагэтуль ставяцца да гомасексуальнасці.

Воўна, якая ратуе жыцці

Rainbow Wool — гэта не проста прытулак для жывёл, а паўнавартасны праваабарончы праект. Увесь прыбытак ад продажу пражы і адзення ідзе ў фонд LSVD+ (найбуйнейшая ЛГБТ-арганізацыя Германіі).

Вынікі працы ўражваюць:

• Дзякуючы сродкам, выручаным ад праекта і ахвяраванням Grindr, удалося дапамагчы амаль 2000 чалавек.
• Гэта людзі, якія ўцякалі з краін, дзе за гомасексуальнасць пагражаюць турма або смяротнае пакаранне.
• Усе яны змаглі пераехаць у бяспечныя краіны Еўропы.

«Авечкі не выбіраюць, кім ім быць»

На пачатку 2026 года адзін з заснавальнікаў праекта, Ёхан, памёр ад раку, але Міхаэль і Надзя працягваюць яго справу.

Для стваральнікаў Rainbow Wool гэтая гісторыя — найлепшы аргумент супраць ідэі пра тое, што сэксуальная арыентацыя з’яўляецца «выбарам». Як кажа дызайнер Майкл Шміт: «Бараны не выбіраюць быць геямі або гетэрасексуаламі. Яны проста такія, якія ёсць». Калі гэта з’ява існуе ў дзікай прыродзе ў дакументаваным выглядзе, значыць, любыя спрэчкі пра «выбар» пазбаўленыя сэнсу.